مقدمة

‫السوق التقني المصري غامض شوية، المعلومات مش متاحة بسهولة بخصوص المرتبات، التقنيات المنتشرة أو بيئات العمل جوة الشركات. بالتالي بتلاقي نفسك دايمًا محتاج محتاج تتواصل مع موظفين شغالين جوة الشركات عشان تعرف معلومات زي ديه. مواقع الـ Reviews المشهورة زي Glassdoor أو غيره مش بيستعمله غير عدد قليل من الناس عشان يشاركوا مرتباتهم، عادة نسبة كبيرة منهم بتبقى موظفين غاضبين.

‫الغموض ده بيخلي إن أي حد يحاول يعرف قيمته السوقية بيتعب. ناس كتير بتسألني انهي تقنيات منتشرة نتعلمها؟ ايه المرتب اللي المفروض نطلبه؟ وهكذا. رغم إن بعض الشركات في مصر بتوظف على الأساسيات فقط زي حل المسائل، تصميم الأنظمة والكود، إلا أن على أرض الواقع، الأغلب بيفضلوا شخص عارف التقنية اللي هما شغالين بيها ومرتاح في الشغل بيها.

‫في محاولة لحل المشكلة ديه وإكمال الحلقة المفقودة، بدأت مشروع جانبي من كام اسبوع. عملت استبيان عشان اجمع شوية بيانات، اتكلمت مع عشرات مهندسي البرمجيات في شركات ناشئة، متوسطة أو متعددة الجنسيات. دخلت على مواقع الـ Reviews زي Glassdoor او مواقع الـ Stack sharing زي Stackshare. شارك في الإستبيان حوالي ٥٠٠ مهندس برمجيات او عامل في مجال التقنية. في الأقسام الجاية هحاول اضيف ترجمتي و تحليلي للإجابات اللي جت.

‫تنويه: اللي هكتبه مش رؤية شاملة عن السوق، هو منحاز تجاه دائرتي والشركات اللي بتابعها ومهتم بيها. وده مش بيتعارض مع الجهد المبذول اللي حصل عشان البيانات تتنضف والمعلومات تبقى دقيقة -قدر الإمكان-. قررت حذف اي شخص شغال في شركة ريموت برة مصر، كل اللي هشاركه، نظريًا، لمهندسين مصريين شغالين في شركات مصرية.

السوق التقني المصري وصعود الشركات الناشئة

‫في السابق إختيارات مهندسي البرمجيات محدودة، عادة الشركات الناشئة كانت غير قادرة على المنافسة الحقيقية -إلا من رحم ربي-، بالتالي سقف الأجور كان اللي بيحطه الشركات العالمية زي Valeo او Vodafone، يا إما الـ Software Houses زي ITworx

‫لكن ده حاليًا بيتغير، صناديق استثمارية ومستثمرين بقوا بيستثمروا بقوة في الشركات الناشئة المصرية.

‫معظم الشركات ديه بتحل مشاكل في المجتمع عن طريق التكنولوجيا، بالتالي بقى مهم لهم انهم يوظفوا ويحافظوا على افضل مهندسين في السوق، ده خلاهم مش بس بيعرضوا مرتبات كبيرة تجذب حتى المهندسين اللي بيفكروا يسافروا، بل بقى فيه مميزات تانية زي تقنيات حديثة، أسهم و رؤية ومشاكل الشركة بتحلها تخليك تحس إنك فعلًا بتصنع فرق.

تقسيم البيانات

‫استقبلت ٤٧١ رد تقريبًا، معظم المشاركين كانوا Backend Engineers, Front-end Engineers, Full-stack Engineers or Software Engineers in Embedded or R&D

‫معظم المشاركين كانت خبراتهم بتتراوح ما بين ٠-٥ سنين

‫المشاركين من شاركات ناشئة كان عددهم اكتر من المشاركين في شركات عالمية او صغيرة ومتوسطة الحجم

‫والأغلبية كانوا شغالين في شركات بتصنع منتجهم هما

الحصص السوقية للتقنيات

‫أحد الاسئلة اللي سألتها في الاستبيان كان عن التقنيات المستعملة جوة الشركة اللى شغال فيها. عملت Word Count لكل تقنية عشان احدد، بشكل مبدأي، الحصة السوقية او مدى انتشارها.

‫ تقدر تدوس على Backend مثلًا عشان تشوفها بالتفصيل اكتر

‫ تقنيات زي الـ Java والـ .Net كانوا مستعملين بقوة في الـ Backend Development يتبعهم الـ PHP والـ Node.js

‫لكن في الـ Frontend Development كما هو متوقع مُسيطر عليه بالكامل من Angular و React. لكن كلمة Angular في الردود اتكررت اكتر.

‫مجاليش ردود كافية من مبرمجي تطبيقات هواتف اقدر ابني منها معلومات واضحة، بس جالي ايحاء ان كوتلين بتنتشر لبرمجة الأندرويد بشكل كبير مؤخرًا.

‫بشكل عام، انا شفت ان تعلم تقنيات زي جافا او سي شارب او انجيولار وريأكت هيزودوا الفرص بشكل واضح.

‫محتاج اقول اني اتكلمت مع مهندسي في الشركات الناشئة الأكثر تمويلًا وجالي ايحاء ان فيه حركة كبيرة تجاه لغة Go. شركات كتير بتحول خدماتها لـ Go حاليًا، ومعظمهم بيفضلوا React على Angular. في رأيي برضه الرهان على Go و React ممكن يكون كويس.

مرتبات

‫في القسم ده هركز على المرتبات وسنين الخبرات لمهندسي الـ Backend, Frontend, Full-stack, Mobile, Software Engineers

0-1 سنين خبرة

نظرة عامة

‫استقبلت ٦٩ رد من المجموعة ديه. المتوسط كان ٨٠٠٠ جنيه و الـ median كان ٧٠٠٠ جنيه واعلى رقم كان ٢٠,٠٠٠ جنيه

‫ودول الردود اللي جولي بالتحديد مترتبين من الأصغر للأكبر

المجال

‫اغلب الشاركين من المجموعة ديه كانوا من شركات صغيرة ومتوسطة الحجم. مرتبات الشركات متعددة الجنسيات كانت اعلى من الشركات الناشئة والصغيرة ومتوسطة الحجم

1-3 سنين خبرة

نظرة عامة

‫استقبلت ٢٠٤ رد من المجموعة ديه. المتوسط كان ١٠,٣٢٠ جنيه و الـ median كان ٩٠٠٠ جنيه واعلى رقم كان ٣٢,٠٠٠ جنيه

‫ودول الردود اللي جولي بالتحديد مترتبين من الأصغر للأكبر

المجال

‫اللي لاحظته هنا ان كان فيه اتنين brackets منتشرين للشركات الناشئة، يا ٥-٨ يا اما ١٥-٢٠ وده الضعف تقريبًا. تحليلي الشخصي ان ده هيفرق ما بين الشركات الناشئة الممولة واللي لسة بتبدأ.

3-5 سنين خبرة

نظرة عامة

‫استقبلت ١٢١ رد من المجموعة ديه. المتوسط كان ١٦,٨٦١ جنيه و الـ median كان ١٦,٠٠٠ جنيه واعلى رقم كان ٦٢,٠٠٠ جنيه

‫ودول الردود اللي جولي بالتحديد مترتبين من الأصغر للأكبر

المجال

‫الشركات الناشئة بتعرض مرتبات اعلى من الشركات متعددة الجنسيات والصغيرة ومتوسطة الحجم في المجموعة ديه. في رأيي ان الشركات الناشئة الممولة اللي عايزين يوظفوا ويحافظوا على افضل مهندسين بيفضلوا يعينوا مهندسين عندهم خبرة شوية عن انهم يعينوا حديث التخرج، ده غالبًا رأيي انتم رأيكم ايه؟ ممكن تحطوه على في الكومنت

5-8 سنين خبرة

نظرة عامة

‫استقبلت ٣٩ رد من المجموعة ديه. المتوسط كان ٢١,٨٨٥ جنيه و الـ median كان ٢١,٠٠٠ جنيه واعلى رقم كان ٥٦,٠٠٠ جنيه

‫ودول الردود اللي جولي بالتحديد مترتبين من الأصغر للأكبر

‫بما إن الأغلبية في المجموعة ديه كانوا team leaders او tech architects/leads، محبتش اقسمهم ب مجالات زي المجموعات السابقة.

‫البيانات قليلة اني اعمل تحليل عن الشركات الناشئة او متعددة الجنسيات للمجموعة ديه، بس لو حد عنده رأي ممكن يكتبه في الكومنتات.

استبيانات اخرى

Automatest

‫من حبة شهور مجموعة Automatest عملوا اسبيان لطيف جدًا عن مرتبين مهندسي ال QA/Testing في مصر. وصلوا لعدد كبير من الردود والمعلومات فعلًا مفيدة فيه لو ده مجالك.

Egyptian Geeks 2018 vs 2021

‫في ٢٠١٨ مجموعة Egyptian Geeks عملوا اسبيان وتقرير اسمه "State of Arab Tech" وقدروا يجمعوا معلومات قيمة عن المرتبات في خبرات مختلفة. الجدول ده ممكن يديلك نظرة عن مقارنة تقريبية بين مرتبات المتوسط في ٢٠١٨ و ٢٠٢١

خاتمة

‫ ديه نصيحة شخصية مني، ف خدها بشك وكون رأي عنها قبل ما تنفذها. حط عينك على الشركات الناشئة، سواء المنتج او التمويلات. لو بصيت على ال head count للشركات الأكثر تمويلا في ٢٠١٩ وبداية ٢٠٢٠ زي سويفل، فيزيتا، حالا وغيرهم هتلاقي ان ال head count زاد في معظم الشركات ديه اكتر من ٥٠٪ في خلال السنتين اللي فاتوا. ده ممكن تستنج منه ان غالبًا الشركات اللي جايلها تمويل حاليًا برضه هيتوسعوا السنين الجاية، انك تشوف التقنيات اللي بيستعملوها ايه وتتعلمها هيكون مفيد جدًا. مهم جدًا برضه تعرف انك ممكن تتفاوض على المرتب، شخصيا بقترح انك تقرأ كورس Grokking Comp Negotiation in Tech

‫حاول تلاقي منتور كويس، ده هيوفر عليك وقت وتوهان كتار. مؤخرًا فيه مهندسين خبراتهم كويسة كتير بتعرض انهم يساعدوا الناس بدون مقابل هحط شوية منهم هنا:

Moustafa Meaily's mentorship

Ahmed Adel's mentorship

Ahmed Taweel's mentorship

‫لو انت مهندس ذو خبرة بتعرض خدماتك بدون مقابل انك ت منتور حديثي التخرج او الطلبة تواصل معايا عشان اضيفك في الليستة ديه. انا مش قادر اعبر عن أهمية انك يبقى عندك منتور واد ايه ده هيوفر وقت ومجهود.

‫في النهاية بشكر كل اللي ساهم في التقرير ده وشاركوا في الإستبيان.

‫ملحوظة اخيرة: الشغل ده اتعمل من حبة افراد في وقتهم الجانبي بالتالي ممكن يكون فيه اخطاء. انا متفهم انك ممكن تبقى معترض عليه واننا فعلا ممكن نبقى غلطنا، بشجعك انك تحلل البيانات بنفسك وتقولنا لو غلطنا في حاجة، هنصلحها. ولو معترض مع حاجة كاتبينها ياريت تعرضها بشكل لطيف، ارجوك.

استبيان جديد

‫لو انت شايف ان التقرير ده مفيد، ف انا بشجعك انك تشارك في الاستبيان. انا زودت اسئلة هتخلينا نقدر نطلع بمعلومات قيمة وكويسة جدًا. ياريت الناس تشارك حتى لو شاركت قبل كدة، عشان الأسئلة اكتر وهتخلي نظرتنا تختلف نسبيا. ممكن تشارك من هنا.

الفريق

‫التقرير ده شارك في عمله:

• محمود سالم
• رندا عادل
• عبدالله طارق
• رنا سمير
• رضوى رضوان
• محمد الزمر

حقوق النسخ

‫تقدر تستعمل وتنسخ المعلومات هنا بأي شكل تحبه، وبنشجعك انك تحلل البيانات وتطلع منها معلومات افضل من اللي احنا عملناه انا هنشرها كلها بدون اي معلومات شخصية زي اسم الشركة. اتمنى بس انك ترجع جزء من الكريدت للتقرير والفريق اللي شارك هنا وانك تنشر النتايج للمجتمع.

المصادر

The Egyptian Startup Ecosystem Report

Data submitted on the survey without any PII